- Poetry
- Religion
- Report an issue
- prev
- next
Article
ਪਟਨੇ ਦੀ ਧਰਤੀ ਤੋਂ ਮਾਂ ਗੁਜਰੀ ਦਾ ਚੰਨ
ਚੱਕ ਮਾਤਾ ਨਾਨਕੀ ਆਇਆ
ਤਾਂ ਇਸ ਧਰਤੀ ਦਾ
ਚਾਅ ਨਾਲ ਸਮੁੰਦਰ ਵਾਂਗ ਉਮੜਨ ਨੂੰ
ਉਛਲਣ ਨੂੰ ਚਿੱਤ ਕੀਤਾ
ਇਹ ਧਰਤੀ ਨਿਓਟਿਆਂ ਦੀ ਓਟ
ਤੇ ਨਿਆਸਰਿਆਂ ਦਾ ਆਸਰਾ ਬਣੀ
ਨੌਵੇਂ ਗੁਰਾਂ ਦਾ ਕੱਟਿਆ ਸੀਸ ਰਾਜਧਾਨੀ ਤੋਂ ਆਇਆ
ਤਾਂ ਇਸ ਦਾ ਜ਼ੱਰਾ ਜ਼ੱਰਾ ਰੋਹ ਨਾਲ ਥਰਥਰਾਇਆ
ਗੁਰਾਂ ਦਾ ਇਕ ਸੀਸ ਅਸਤ ਹੋਇਆ
ਅਣਗਿਣਤ ਸਿਰ ਸਤਿ ਸ੍ਰੀ ਅਕਾਲ ਦਾ ਜੈਕਾਰਾ ਬਣ ਉਦੈ ਹੋਏ
ਬਾਹਰ ਫੌਲਾਦੀ ਤੇਗਾਂ ਲਿਸ਼ਕੀਆਂ
ਅੰਦਰ ਸ਼ਬਦ ਬਾਣ ਚੱਲੇ
ਵਾਸਨਾ, ਖ਼ੁਦਗਰਜ਼ੀ, ਹਉਮੈ, ਕਰੋਧ ਤੇ ਲਾਲਚ ਗਏ ਸੱਲੇ
ਕੋਲ ਵਗਦਾ ਸਤਲੁਜ ਧੰਨ ਹੋਇਆ
ਨੈਣਾਂ ਵਿਚ ਤਾਰੇ ਜਗੇ
ਹਰ ਬੁਝਿਆ ਚਿਹਰਾ ਚੰਨ ਹੋਇਆ
ਗ਼ਰੀਬ ਲਈ ਪਾਤਸ਼ਾਹੀ ਦਾ ਫ਼ੁਰਮਾਨ ਹੋਇਆ
ਪੁਰਖਿਆਂ ਦਾ ਬੇਗ਼ਮਪੁਰੇ ਦਾ ਸੁਪਨਾ
ਆਨੰਦਪੁਰ ਦੇ ਨਾਂ ਨਾਲ ਤਾਮੀਲ ਹੋਇਆ
ਦੀਨ ਹੇਤ ਲੜ੍ਹਨਹਾਰਿਆਂ ਦੀ ਖਾਲਸ ਫ਼ਸਲ ਤਿਆਰ ਹੋਈ
ਹੱਕ, ਸੱਚ, ਨਿਆਂ ਦੀ ਸੁਰੱਖਿਆ ਲਈ
ਸਬਰ ਤੇ ਸ਼ੁਕਰ ਦੇ ਕਿਲੇ ਉਸਰੇ
ਬੁਰਜਾਂ ਤੋਂ ਰੋਹੀਲੇ ਬੋਲ ਗਰਜੇ-
ਕੂੜ, ਜਬਰ ਤੇ ਅਨਿਆਂ ਨੂੰ ਮਾਰਨ ਲਈ ਲੜਾਂਗੇ
ਇਹ ਰਹਿਣਗੇ ਜਾਂ ਅਸੀਂ ਰਹਾਂਗੇ
ਸੱਚੇ ਪਾਤਸ਼ਾਹ ਦੀ ਅਰਸ਼ੋਂ ਉੱਚੀ ਕਲਗੀ ਸਾਹਵੇਂ
ਬਾਦਸ਼ਾਹੀਆਂ ਤੁੱਛ ਹੋਈਆਂ
ਸਤਿਗੁਰਾਂ ਛੱਡ ਕੇ ਆਨੰਦਪੁਰ
ਚਹੁੰ ਤਰਫੀਂ ਗੋਬਿੰਦ ਮਾਰਗ ਵਿਛਾ ਦਿੱਤਾ
ਚੱਪੇ ਚੱਪੇ ਨੂੰ ਆਨੰਦਪੁਰੀ ਜਜ਼ਬੇ ਨਾਲ
ਮਹਿਕਣ ਲਾ ਦਿੱਤਾ
Add a review